Azərbaycan Voleybol Federasiyasının (AVF) prezidenti Şahin Bağırov, baş katib Faiq Orucov və İcraçı direktor Vüqar Hüseynzadə “Murov Az Terminal” voleybol klubunun təlim-məşq bazasında olublar.
Bazanın fəaliyyəti ilə tanış olan qonaqlar idmançı və məşqçilərlə də görüşüblər. “Murov Az Terminal” klubunun prezidenti Cavid Kərimov qonaqlara burada yaradılmış şərait barədə ətraflı məlumat verib.
Daha sonra federasiya prezidenti “Murov Az Terminal” klubunun yeni təmir olunmuş fitness zalının açılışını edib.
Qeyd edək ki, “Murov Az Terminal” klubu Yüksək Liqa yarışları ilə yanaşı, aşağı yaş qruplarının yarışlarında da qız və oğlan komandaları ilə təmsil olunur.