“Gəncə” klubunun Voleybol Akademiyası belaruslu məşqçi Nadejda Rudakovskaya ilə müqavilə imzalayıb.
Bu münasibətlə yaxın vaxtlarda istifadəyə verilmiş Gəncə İdman Sarayında tədbir təşkil olunub.

Çıxış edən “Gəncə” klubunun prezidenti Elvar Osmanov ölkəmizdə idmana göstərilən dövlət qayğısından, regionlarda Azərbaycan Voleybol Federasiyasının həyata keçirdiyi uğurlu layihələrdən və rəhbərlik etdiyi komandanın yeni mövsümə hazırlığı barədə məlumat verib.

Mütəxəssis Akademiyanın hədəfləri, regionda idmanın voleybol növünün kütləviləşməsi və peşəkar voleybolçuların hazırlanması istiqamətindəki planlar barədə təqdimatla tanış olub.

Belaruslu mütəxəssis Nadejda Rudakovskaya müqaviləyə imza atdıqdan sonra bildirib ki, yüksək qonaqpərvərlik və mükəmməl idman infrastrukturunun olması uğurlarımız üçün başlanğıc olacaq. Bunları nəzərə alaraq, əlimdən gələni edəcəyəm ki, Akademiyanın komandaları nailiyyətlərə imza atsınlar. Hazırda qarşımızda əsas hədəf Azərbaycan Voleybol Federasiyasının “Volleyball Kids” layihəsinin inkişafına töhfə verməkdir. Bu istiqamətdə işlərə artıq sabahdan start verəcəyik. Yeni təhsil ilinin başlanmasını nəzərə alaraq, hazırlıq prosesi uşaqların rahatlığı üçün onların və valideynlərinin razılığı əsasında təyin olunacaq.

Nadejda Rudakovskaya son olaraq Belarusda “Jemçujina Polesya” İxtisaslaşdırılmış Olimpiya Ehtiyatları Uşaq-Gənclər Məktəbindən məşqçi-müəllim vəzifəsində çalışıb. Onun yetirmələri hazırda Belarusun müxtəlif yaş qruplarından ibarət milli komandalarında və dünyanın bır sıra klublarında forma geyinir.